كمخرج كمان لازم اعترف اني كنت مبهور و انا بشتغل معاه بإجتهاده و ثقافته و حبه لشغله … ٣ شهور التصوير مالك لابس شخصيه مختلفه عنه اجتماعياً و ثقافياً و شكلياً و مفيش ثانيه خرج بره الكاريكتر … مش وقت التصوير لأ ده طول الوقت، و هو بياكل و هو في بيته و في حياته … في آخر الفيلم قالي انا حاسس اني مستوي ذكائي و ثقافتي نزل بقي زي الشخصيه من كتر ما عيشته. اقسم بالله الكلام ده مش كلام اكل العيش بتاع البرامج و اللي كان عامله ده مكانش طبيعي لأني مشفتوش قبل كده في حياتي.

بفكركوا تاني احمد اعتذر علي الفيس بوك و عمل مداخله مع يوسف الحسيني اعتذر تاني بس محدش شيرها عشان احنا بقينا متطرفين عاوز نشير المواقف الحراقه و المولعه بس … و طبعاً فيه ناس حقيره زي مذيع قعد يزن علي مالك انه يطلع معاه و لما محصلش قعد في الحلقه يطلع اكاونتات مزيفه لمالك بتقول انه معتذرش و بتنسبله مواقف مخدهاش … دي بتبقي خطه عشان المذيع يجبرك تعمل مداخله غصب عنك و يعمل انفراد بالعافيه

مالك بالفعل اتعاقب، شعبيته اتخصم منها كتير، و اتوقف عن العمل لأجل غير مسمي و بيواجه محاكمه، ده غير نمره تليفونه و عنوان بيته اللي نزلوهم علي النت و اللي مخلياه عايش في تهديد متواصل لم يتوقف لحظه.

مالك مشروع انسان و فنان رائع و لو غلط لازم نحط الغلطه دي في اطارها و مش لازم ندبحه، و طبعاً هي مفارقه غريبه ان معظم الفنانين اللي بيطالبوا بشطبه دلوقتي هما فنانين كانوا في نفس الموقف من خمس سنين بفكرهم بكده عشان يحاولوا يتخيلوا نفسهم مكانه … مع انه هو اعتذر تاني يوم و هما لحد انهارده معتذروش (مش علي رأيهم اللي هما حرين فيه و لكن علي اتهامات بالخيانه و طعن في الذمه و الشرف)

علي الطرف الآخر الاستاذ اشرف ذكي اللي من ٥ سنين اتهاجم بشراسه برضه، موقفه قمه في الاحترام. تحيه ليه و لكل شخص قادر يحط نفسه مكان الآخرين”