منذ أن تم إلغاء عرض الفيلم القصير “بائع البطاطا المجهول” بطولة خالد أبو النجا في مهرجان دبي السينمائي قبل عرضه ب24 ساعة , وقد التزم كل فريق عمل الفيلم الصمت ولم يتحدث أحدا منهم إطلاقا عن أسباب المنع ولا حتي الحالة النفسية التي صاحبتهم بعد هذا المنع المفاجيء بعد أن كان الفيلم مدرجا للعرض ضمن مسابقة المهر القصير , وبعد كل هذه الوقت منذ إنتهاء المهرجان يوم 14 ديسمبر الجاري , قرر مخرج الفيلم أحمد رشدي الذي يقدم أول تجاربه السينمائية عن يتحدث عن هذا المنع وكتب تحت عنوان ” بيان شخصي بخصوص منع عرض فيلم بائع البطاطا المجهول في دبي السينمائي ”
وقال رشدي في بيانه : “في الاول احب اقول للناس … ان الفيلم تم تبليغنا بعدم عرضه قبلها ب٢٤ ساعه بس ولغي كل الفيز سواء لتارا او لخالد كمان ومش هعقد اتكلم قد ايه الموضوع كان صادم بالنسبه لينا .. مالناش في الدراما.. بس تمام انا اضايقت وقضيت انا وفريق عمل الفيلم كام يوم من الحزن بس ده مش مجرد من انه مطب جامد شويه في طريق الفيلم.
طبعا طلعت تصريحات من جرنال الاهرام في سرعة البرق ان الفيلم نسخته فيها مشكله والجو ده وده للاسف مش حقيقي ومعايا ما يثبت ان تم تسليم نسخه تم الموافقه عليها من قبل المهرجان يوم ٢٠ نوفمبر.. الصحفيين مستنيين مني اني اقول كلام كتير قوي بسبب الحركة دي وانا فضلت الصمت ومش متكلم في الحوار ده .
أسباب الصمت ايه ؟
اني لو عايز اكل عيش علي موضوع منع عرض الفيلم ده واني متهض بقي واني الضحيه والفنان اللي بيتمنعلوا حاجات بيعملها .. دي اسهل حاجه في الكون والناس كلها عارفه ده والصحفييين اما بيصدقوا .. بس انا عامل فيلم وعارف عواقبه كويس قوي اكتر من اي حد .. ومن غير شعارات فارغه هفضل اكمل اللي بعمله في العالم المجنون اللي عايشين فيه ده وانا عايش عشان الحلم ده وهيا دي المتعه الحقيقيه بالنسبه لي وبالنسبه للناس اللي معايا وهنفضل نعمل حاجات الناس مختلفه في السينما والناس تحبها .. والفيلم رسالته إنسانيه لابعد الحدود .
اخيراً شكرا لكل واحد أهتم بالموضوع وسألني وبيطمن عليا بصفه دوريه واحب اطمنهم أن لو فاكرين أن انا وفريق عمل الفيلم هيكسرنا حاجه زي دي تبقوا لسه ماتعرفوناش : ) .. احنا عيال هنكسر الدنيا وده مش كلام انشا .. استنوا بس”
فيلم “بائع البطاطا” ينتمي إلى نوعية أفلام الأنيميشن، وتدور أحداثة حول شاب مصري يدعى خالد يبحث في جريمة قتل لطفل كان يبيع البطاطا فى قلب ميدان التحرير أثناء الثورة المصرية، وتتحول الحادثة إلى أحلام وكوابيس تطارد هذا الشاب الذي يقرر البحث عن القاتل، وهو من إخراج أحمد رشدي، والأداء الصوتي لـ خالد أبو النجا وتارا عماد.
وكانت إدارة مهرجان دبي السينمائي الدولي وفريق عمل فيلم “بائع البطاطا” قد أصدرا بيانا مشترك أكدا فيه أنه تعذر عرض الفيلم لظروف طارئة وخارجة عن إرادة الطرفين متمنين للفيلم النجاح في عرضه المقبل.
