الصور دي كانت اخر مرة نتجمع فيها مع بعض. بعدها بشوية انا سبت البلد. الصور دي بانشرها مش عشان افتكر البرنامج . انا بانشرها عشان انا فخور جدا بكل الناس اللي في الصورة دي اللي دلوقتي كل واحد فيهم يا اما عنده البرنامج بتاعه او له دور مؤثر في برامج تانية. خالد و شادي عاملين شغل مافيش احلى من كده في ساترداي نايت بالعربي.ما كانش حد تاني يقدر يعمل الشغل ده و كونهم انهم يبقوا جزء من كتابة تاريخ التلفزيون العربي في حاجة تاريخية زي البرنامج دي فده شئ عظيم.و طبعا وراهم فريق هايل كان نفسي يبقى ليا الحظ اني اشتغل معاهم.
أيمن حيبتدي برنامجه الجديد قريب، ايمن من مهندس عبقري لكاتب عبقري لاكيد مقدم برامج عبقري فانا مش خايف عليه.
هند احسن منتج فني في مصر، من غيرها ما كنتش حقدر اجمع الفريق العظيم ده ولا اديره. شغاله في كذا برنامج من خلف الكواليس و شغلها باين و لسه حيبان.
ريتا line producer مافيش زيها و جندي مجهول في برامج كتيرة. استحملت سخافة الشغل و كانت بتقعد على المونتاج لما الكل كان بيروح
خليفة مخرجي المفضل و” الوحيد” بيخرج كذا حاجة و مازال بيرسم بعدسته اعمال فنية في كل حاجة بيعملها ..
وسام ، والله يا وسام مش عارف بتعمل ايه دلوقتي لا باهزر، وسام بيكتب في خمسين حاجة ما بين اعلانات و برامج، مبسوط انك انضميت معانا في الاخر و زعلان ان ده ما طولش أنديل مش باين ف يالصورة لانه متمرد و ديماجوجي و سفسطائي فبيحتقرنا و مش بيخرج معانا ، بس باحبه برضة.
الصورة للاسف مافيش فيها الفريق العظيم اللي كان بيعد و بيدور و بيبحث في الالف الساعات يوميا. شغلهم باين في برامج كتير، من ساترداي لايف، لابلة فاهيتا لميصحش كده لحاجات على النت زي فينيت و جلوكال وحاجات كتيرة تانية. انا مبسوط اني كان ليا الحظ اني اشتغل معاكم كلكم. و صحيح البرنامج وقف لكن التجربة دي طلع منها المواهب العظيمة دي. منهم اللي بيقولوا انهم اتعلموا من البرنامج و انا مش موافق على كده. البرنامج كان مجرد محطة اتقابلنا فيها و اللي حصل بعد كده استحقاق طبيعي لموهبتكم. هل حنتجمع تاني مع بعض و لا لأ ؟ الله اعلم. حتفضل بيننا الذكريات الحلوة و الشغل اللي بيطلع كل يوم منكم في برامج كتير و بيفكرنا بشغلنا مع بعض. و كلمة صغيرة لخليفة :”فاكر لما كنت باقولك: “البرنامج حيجيله يوم و يتمنع و كلكم حتشتغلوا و انا اللي حاقعد في البيت؟” شفت؟ كان عندي حق و انا مش زعلان بالعكس .

الواحد سعيد انه جاتله فرصه مش متاحة لحد تاني. في تلات سنين عملنا اللي ناس تانية ماعملتوش في تلاتين سنة. و انتم لسه مكملين. و كل سنة و انت طيبين بمناسبة عيد ميلادي، الاسبوع الجاي