كشف مهرجان كان السينمائي منذ قليل عن جوائز مسابقة “نظرة ما” والتي شهدت مشاركة الفيلم المصري “اشتباك” الذي أفتتح المسابقة وحقق رد فعل متميز علي مستوي الصحافة والنقاد حتي أن أحدي المجالات الشهيرة أختارته من ضمن أهم 10 أفلام في المهرجان خلال هذه الدورة

وقد علق منتج الفيلم محمد حفظي عن خروج الفيلم بلا جوائز قائلا : “لكل الناس اللي بَارَكْتلنا و اتمنتلنا الفوز و التوفيق باشكركم. للأسف اشتباك ما حصلش علي جائزة في كان لكن يكفينا اختياره كفيلم الافتتاح لمسابقة نظرة ما و الاستقبال العظيم من الجمهور و الصحافة الدولية و الموزعين العالميين و اختياره من عدة مطبوعات عالمية ضمن أفضل أفلام المهرجان. شكرًا لكل فريق الفيلم واحد واحد و علي رأسهم المخرج محمد دياب.

أيضا المخرج والسيناريست محمد دياب والذي نجح في أن يحقق حلمه بالتواجد في هذا المهرجان الابرز علي مستوي العالم فقد علق أيضا علي ذلك قائلا : ” السبب الوحيد اللي مخليني زعلان اننا مخدناش جايزه ان كان نفسي الناس تلاقي حاجه تفرحها وسط الغم و ان كل شاب محبط يحس انه يقدر يوصل لأي حلم حلمه. الايام اللي فاتت حسيت اني محمد صلاح لعيب الكوره اللي بقي مصدر السعاده الوحيد و هو بينجح و بيرفع راس مصر بين اهم انديه العالم

مع كل خبر عن الاستقبال الايجابي للفيلم او عن اختيار النقاد ليه من اهم ١٠ افلام في المهرجان، او اختياره من الخمس افلام المدعومه من رابطه السينمات المستقله في فرنسا كنت بشوف الناس بتفرح كأنه جون لمصر في كاس العالم

الحاجه الحلوه ان اللخبطه اللي عايشنها في مصر بتتحول لمصدر الهام فني لجيل جديد. معنديش شك ان كل مهرجانات العالم و اي تظاهره فنيه هنشوف فيها فنانين مصريين هيخترعوا طرق متخيلنهاش عشان يعبروا عن نفسهم … كنت هتضايق لو كنت حاسس ان وجودنا هنا صدفه و مش هيتكرر، بس ده اجتهاد و تعب و عرق و تفكير و اكيد مكلل بتوفيق ربنا .. عشان كده متأكد ان لينا جولات تانيه كتير

يمكن تكون رحله مهرجان كان انتهت، بس رحله اشتباك لسه بادئه في كل مهرجانات العالم و لو الدعم اللي شايفه منكوا اتوجه لقاعات السينما في مصر، ساعتها هنشوف افلام زي اشتباك و احلي من فنانين كتير محتاجين دعمكوا

نفسي اشكر كل انسان باركلنا او دعمنا او دافع عن الفيلم (خاصه الزملاء الفنانين) و بعتذر اني معرفتش ارد علي كل واحد و اشكره بنفسي

شكرا ليوسف شاهين و يسري نصرالله و صناع ال٢٣ فيلم مصري اللي شاركوا قبل كده عشان انتو اللي فتحتولنا الباب هنا، و شكرا لكل الفنانين المصريين اللي مستوي شغلهم تطور في السنين اللي فاتت و اللي كانوا مصدر الهام شخصي

و اهم شكر للي آمنوا بالفيلم وقت ما ناس قالت مستحيل يتعمل و كل شخص اشتغل في الفيلم و عمل اضعاف المجهود … و اللي هيشوف الفيلم ده هيعرف قد ايه اللي اشتركوا فيه بيحبوا بلدهم

اما كل واحد حس ان الفيلم بيمثله و كان بيتمنالنا و لمصر الخير و بعتلنا دعوه او شويه طاقه ايجابيه … الف الف شكر

و زي ما قولت قبل كده احنا كسبنا اهم جايزه و هي احترام العالم ”

المعروف أن هناك عدد من شركات التوزيع علي مستوي العالم قد تعاقدت علي عرضه بعد المهرجان بين دول أوروبا وأسيا