وجه النجم محمد عادل امام رسالة الي قراصنة الافلام بعد أن انتشر مؤخرا سرقة مجموعة من الافلام المعروضة حاليا في دور العرض علي شبكات التواصل الاجتماعي مما أدي الي خسائر باهظة للمنتجين , وقد نشر أمام صورة لاحدث سرقة وهي فيلم “كنغر حبنا ” لرامز جلال ووجه أمام رسالة لجمهوره قال فيها ” ليه في عقلية بتفكر بالطريقة دي !؟ و ليه في ناس مركزه في موضوع انها تسرق الافلام ومجهود ناس تانية و تنزلها علي النت بالرغم إن القانون بيمنع ده !؟ بجد بيستفيدوا ايه !؟ علي فكرة احنا كل حياتنا و طاقتنا و مجهودنا رايحين في إن احنا نعمل حاجات تبسطكم و تستمتعوا بيها .
واستكمل أمام : الصناعة دي فاتحة بيوت ناس كتيره جداً، الفيلم الواحد بيشتغل فيه حوالي من ٥٠٠ ل ٧٠٠ شخص
ده غيرالضرايب الكتيرة اللي بتدخل للدوله من ورا اي عمل سينمائي و كمان فلوس تصاريح التصوير في اي مكان في البلد ، غير النقابات … صناعة السينما من اهم مصادر الدخل القومي للبلد و الوحيدة اللي واقفه علي رجليها رغم ظروف البلد الاقتصاديه
و من غير اي دعم من الدوله نفسها !! الفيلم الناجح مش المنتج بس و السينمات اللي بيكسبوا منه ، لا ده كمان المحلات و مطاعم الاكل اللي جنب السينمات والمواصلات و التكاسي اللي بتوصل الناس للسينما و ناس تانيه كتير بتسترزق بسبب فيلم .
نجاح الافلام بيبقي حالة عامه بتعم علي الكل .. ارجوكم ماتبوظوش الصناعة دي كمان … (( ملاحظة اخيرة )) المتعة في مشاهدة الفيلم بتبقي مع صحابك او أهلك او حبيبتك في قاعة السينما و تخرجوا بعدها تتفسحوا .. مش لوحدك في اوضتك بشاشه صغيرة و نسخه وحشه كمان ..
بس كده
