شن سعيد حساسين صاحب قناة العاصمة ومذيع برنامج “أنفراد” في حلقة أمس هجوما علي الكينج محمد منير بسبب الحفل الذي أقامه في ستاد القاهرة رغم الحزن الذي يخيم علي أقارب وعائلات ضحايا الطائرة المنكوبة , وقد تهكم حساسين علي اصرار منير بتقديم الحفل في هذه الظروف وعلق قائلا “أرحم امنا ..طهقت عشيتنا “
هذه السخرية وهذا الهجوم تصدي له الشاعر المتميز أكير طعيمة الذي وجه حديثة تحت عنوان “تعليقا علي فيديو الكائن ده بتاع الأعشاب
مقدمة ضرورية: أنا طبعا مش مع الاحتفال بأي شيء اليومين دول، و رغم نزول أغنية “واحدة كاملة” لأنغام من كلماتي و هي أغنية مهمة بالنسبالي أجلت اني أشيرها علي حساباتي لمدة ال ٣ أيام الحداد و كنت أتمني انها ما تنزلش أصلا بس ده مش قراري .. و لكن:
١- إلغاء حفل قبل موعده ب ٢٤ ساعة مش بالسهولة اللي حضرتك بتحضر بيها أعشابك و دي بيوت مفتوحة و ناس دافعة فلوس و فيلم أكبر من إن عقلك يستوعبه، و أنا مش شاكك ان منير نفسه كان يتمني يعمل كده و ما نفعش.
٢- بحسبة الوزن النسبي لو حطينا محمد منير اللي هو كنج غصب عنك في كفة و حطيناك في كفة … كأننا بالظبط بنوزن حوت في مقابل نملة .. نملة مش عارفين طلعت لنا من أنهي خرابة و ايه مقوماتك عشان تبقي عضو مجلس شعب و تقدم برامج كمان.
٣- ما تزايدش علي وطنية محمد منير لأن محمد منير قدم لبلدك اللي لا انت و لا الف بتوع اعشاب زيك قدموه، محمد منير زرع فينا و في أجيال كتير الذوق و الإحساس و الإنتماء للوطن من أيام ما كنت انت حساسين صغير و بتعمل بيبي علي روحك، محمد منير إسم بنفخر بيه في كل مكان في العالم مش بس في الوطن العربي، و لو قلت لأي واحد في العالم حساسين بيتريق علي محمد منير هيقولك يعني ايه حساسين الأول و غالبا مش هنلاقي رد.
٤- إسمها بلاها (بالفتحة) مش بلاها (بالكسرة) يا مذيع يا جامد… و ان كنت اتفق معاك ان الفيديو ده من أوله لأخره بلاهة فعلا.
٥- و دي معلومة ممكن تضايقك أكتر: محمد منير ما بياخدش ١٠٠ الف جنيه في الحفلة يا حساسين .. ده محمد منير يا إبني.
٦- حفلات محمد منير مش رقص و هلس زي ما عقلك الصغير متخيل … الجمهور اللي بيروح لمنير بيروح عشان يسمع شبابيك و شجر الليمون و من أول لمسة و حدوتة مصرية و إتكلمي وعشرات من الأغاني اللي أقل أغنية فيهم أهم من اللي انت ممكن تكون عملته و هتعمله في حياتك.
٧- معلومة ناس كتير ما عرفوهاش: منير لما أخوه توفاه الله كان عنده حفلة بعدها بكام يوم و ما لغهاش و كان بيغني و هو بيبكي، لأن الفن عند منير حاجة تانية خالص ممكن اقعد سنين عشان افهمهالك و مش هتفهمها برضه، تفتكر منير ما زعلش علي أخوه زي زعلك علي حادث الطائرة.
– انت ريحت منير و اللي بيحبوه لأنك قلت انك مبقتش بتحبه و بتحترمه .. أصل ما ينفعش جمهور منير يتحط في خانة واحدة معاك يا حساسين، يعني لو رجعت تحب منير تاني قلنا عشان يا هو يعتزل يا احنا نبطل نسمعه.
٨- لما تتكلم عن منير حتي لو فيه مبرر للنقد و هو الي حد ما موجود من وجهة نظر البعض: “تتكلم بإحترام .. انت بتكلم محمد منير يا ولد” (بصوت السادات).
٩- مصر اللي مش عجباك عشان منير دي يا حساسين، منير من الحاجات الحلوة اللي فيها، الحاجات الحلوة قوي، و لما الأقزام عشان أكل العيش يضطروا يتكلموا عن العمالقة لازم يختاروا ألفاظهم .. يا حساسين .. بس هو فعلا يعني ايه حساسين يا حساسين ؟
ربنا يرحم ضحايا الطائرة و يتقبلهم شهداء و يرحمنا احنا كأحياء بنضطر نتكعبل في اللي زيك يا حساحساحسا .. اتشششششششي .. معلش الفلفل خلاني أعطس.
بقت ماشية ب ……….. (أكمل مكان النقط)
