كشف الممثل الشاب هادي خفاجة عن اعتزاله التمثيل نهائيا بسبب موقف محرج تعرض له في برنامج “وش السعد ” للنجم محمد سعد , وأكد هادي انه سيقوم اليوم بتسليم كارنيه عضويته الي نقابة المهن التمثلية لانه لم يعد يلزمه بعد الان
وروى “هادي” تفاصيل الواقعة، عبر صفحته الشخصية بموقع التواصل الاجتماعي “فيس بوك”، «قررت أنا هادي خفاجة اعتزال التمثيل نهائياً في مصر، وده بسبب الموقف اللى أنا هاحكيه هو موقف في قمة قلة الذوق اللى في الدنيا جاتلى مكالمة الساعة ١٢ بليل أن محمد سعد عايزنى في تصوير في حلقة من برنامج (وش السعد) اللى هيا كانت انهارده وانه عايز يقعد معايا طبعاً لبست وروحت الساعه ١ بليل كان موجود الكاست كله ونجوم الحلقه آيتن عامر ومنة عرفه وعملنا بروفه واتفقت مع مدير الانتاج والملابس وكل حاجه واستاذ سامح عبدالعزيز المخرج قعدت معاه واتكلمنا عن الشخصيه واتفقنا إن التصوير بعدها بيوم وخلصت كانت الساعه ٤ الفجر».

وتابع: «روحت البيت نمت وصحيت استعديت نفسياً إني رايح التصوير وحفظت السيناريو كان المعاد الساعه ٥ المغرب لقيت اتصال وأنا في الطريق الساعه ٤ العصر من واحد من مساعدين الإخراج بيقولى استاذ هادي إحنا أجلنا الاسكتش بتاع حلقة حضرتك وهنكلمك نقولك امتى التصوير ان شاء الله، افتح Mbc Masr من شويه اأاقي الاسكتش بتاعى اتصور بممثل تانى؟ طب ليه الف والدوران الحمد لله تاريخي مش هيقف على حلقه بس موضوع تقدير أنا حبيت أحكي لانى وسط حاجات كتير حصلتلى مكنتش مستحمل حركه زى دى».

واختتم: «بكرة بإذن الله هاكون في نقابة المهن التمثيلية وهاسلم أستاذ أشرف ذكى عضوية النقابه لانها متلزمنيش في شئ دلوقتى بس بجد كفايه تدمير في المواهب واحباط في الناس لأن الوسط بجد اصبح عن عصابات تتحكم فيه، وأن شاء الله هاكمل مستقبلى الفنى في دولة تانيه بتقدر الانسانيه قبل المواهب والمجالات وده قرار نهائى بجد بينى وبين نفسى مش هرجع فيه».